Makala
KUTEKWA KWA KIBANDA
Kibanda ni Nani? Mwanahabari, Mnyakyusa, na Mkristo
Msomaji Raia
Toleo la 285
13 Mar 2013
Absalom  Kibanda akiwa hospitalini alipotembelewa na Rais Kikwete

NIANZE kwa kuomboleza msiba wa jicho moja la Absalom Kibanda. Jicho hilo lilijeruhiwa na watu wabaya usiku alipotekwa na kupigwa na watu hao.

Tumejulishwa kuwa madaktari wanne walijitahidi sana kuokoa jicho hilo lakini wameshindwa na kuthibitisha kuwa jicho hilo limekufa rasmi. Kiungo kimoja na cha muhimu sana cha mwili wa Kibanda kimetoweka.

Hatukuhudhuria mazishi ya kiungo hicho lakini inatosha tukiamini kuwa kiungo hicho hatunacho tena. Kimetoweshwa. Kimetoweshwa na watu waoga. Mola alaze mahali pema peponi, jicho la ndugu yetu Absalom Kibanda. Amina.

Kwa kuwa sasa ni wazi taifa letu linaangamizwa na ombwe la utawala, ni sahihi nikisema kuwa kutekwa, kupigwa na kuumizwa vibaya kwa Mwenyekiti wa Jukwaa la Wahariri Bwana Absalom Kibanda, si jambo la bahati mbaya. Lina dalili za kupangwa kwa makini na watu wenye akili za uharibifu.

Nasema hivyo kwa sababu, Absalom Kibanda ana vigezo vyote vitatu ambavyo vimekuwa vinausumbua sana mfumo wetu. Na sifa moja ya watu dhaifu huwa ni “kuwaondoa” (eliminate) watu wanaoonekana wana ujasiri wa kuwakosoa. Vigezo vitatu alivyo navyo Kibanda kiasi cha kuwavutia majasusi waliomteka na kumuumiza ni kwa kuwa ni mwanahabari, Mnyakyusa na ni mkristo.

Waandishi wa habari ni moja ya makundi ambayo kwa kawaida huwindwa na tawala dhaifu popote duniani. Tawala hizo huanza kwa kuweka sheria kandamizi na kali kudhibiti uhuru wa habari. Hilo Iinaposhindikana hutafuta mbinu ya kuwanunua waendane na utawala dhaifu. Hilo likishindikana ndipo huanza kuwaondoa mmoja baada ya mwingine au kuwapa ulemavu utakaozuia wao kuendelea na kazi zao kwa ufanisi.

Mazingira yetu yanaashiria ya kuwa tumeishapitia hatua hizo kwanza kwa kuendekeza sheria kandamizi zinazokandamiza uhuru wa habari. Katika miaka saba iliyopita tumeshuhudia kufungiwa kwa magazeti kadha wa kadha kama Mwanahalisi (mara mbili), Kulikoni na hata mitandao ya kijamii.

Tumeshuhudia waandishi wa habari wakiundiwa kesi za ajabu na kupelekwa polisi na mahakamani. Tumeshuhudia waandishi wa habari wakipigwa, kunyang’anywa vitendea kazi na kuuawa na polisi.

Tumeshuhudia mara kadhaa waandishi wakishambuliwa na kuingiliwa katika ofisi zao wakiwa kazini. Katika matukio hayo yote, hakuna mtu aliyekamatwa, kushitakiwa na hatimaye kutiwa hatiani. Badala yake tumeona machozi ya mamba yakitiririka katika mashavu ya watawala kuomboleza majanga hayo yanayowapata wana habari.

Tumeshuhudia misusuru ya magari wakienda hospitalini kuwaona majeruhi na kutoa ahadi za kusaidia matibabu na zile za kuhakikisha wanakamata waliohusika. Wenye hekima wanaamini kuwa serikali yenye mkono mrefu haiwezi kushindwa kukamata mhalifu, ikishindwa, kuna jambo. Imani hii imejengeka mioyoni mwa Watanzania na haiwezi kufutika kwa ahadi hewa.

Absalom  Kibanda Kibanda ni Mnyakyusa anayetoka Mbeya. Katika hali inayoshangaza watu wengi, Mbeya ni Mkoa ambako wanatoka watu wengi waliokumbwa na masaibu ya kutekwa, kupewa sumu, na kuuawa katika mazingira tata. Hata kama baadhi ya matukio hayana uthibitisho, lakini watu wengi wamefanywa kuamini tuhuma chanzo cha masaibu yaliyowapata watu watokao Mbeya na kutishia maslahi ya watawala.

Tumepata kusikia habari za Mbunge wa Kyela na Waziri wa sasa wa Uchukuzi Dk. Harrison Mwakyembe ambaye inadaiwa alipewa sumu inayoendelea kuitafuna ngozi yake. Baada ya dana dana za polisi na kigugumizi cha kusema wazi chanzo cha ugonjwa wa Dk. Mwakyembe, serikali iliona ni vema apozwe kwa kupewa cheo kinachomnyima uhuru wa kuvunja kiapo cha uwajibikaji wa pamoja. Kwa sababu anazozijua, amethamini cheo kuliko uhai wake. Laiti angefuta tuhuma alizozimwaga hadharani kabla hajapewa vyeo hivi!

Tumewahi kusikia tetesi zinazotatanisha kuhusu kuugua kwa Profesa Mark Mwandosya, Mbunge wa Rungwe na Waziri asiye na Wizara Maalumu. Inashangaza kwa nini atafutwe kuangamizwa na watu hawa kama tetesi hizo zina ukweli wowote. Lakini kimsingi, tawala dhaifu na dhalimu huwaogopa sana watu wenye uwezo kiakili. Profesa Mwandosya anatoka Mbeya pia na ni yeye, serikali na Mungu wetu wanaojua nini chanzo cha ugonjwa wake.

Tulishuhudia kutekwa, kuteswa na hatimaye kutupwa porini kwa Mwenyekiti wa Umoja wa Madaktari nchini, Dk. Stephen Ulimboka. Yeye pia anatoka Mbeya sawasawa tu na Kibanda pamoja na wengine niliowataja. Mpaka sasa amekaa kimya lakini kuna mawili yanayohitaji ufafanuzi kutoka serikalini.

Kwanza, kwa nini ililifungia gazeti la Mwanahalisi wakati lilikuwa linaisaidia serikali kujua ni kina nani waliohusika kumteka Dk. Ulimboka. Katika hali ya kawaida tungedhani baada ya watawala kusema serikali haihusiki na utekaji huo, basi serikali ingefanya kazi na Mwanahalisi katika kuwatafuta waliohusika maana Mwanahalisi lilionekana kujua ni kina nani.

Pili, kwa nini serikali haitoi taarifa juu ya uchunguzi ilioufanya kuhusiana na sakata hilo? Kukosekana kwa maelezo ya masuala haya mawili, kunauachia umma njia moja tu ya kulielewa suala hili- nayo ni kuwa, mtekaji anajulikana, mtekaji analindwa, na alitumwa kwa sababhu ambazo umma hauwezi kuzijua.

Ndipo likaja la David Mwangosi kuuawa mikononi mwa polisi. Suala hili liko mahakamani lakini itoshe kusema tu ya kuwa Mwangosi pia anatoka Mbeya na alikuwa ni mwandishi wa habari.

Sifa nyingine ya tawala dhaifu huwa ni kuua watu kwa mashinikizo ya imani za kishirikina na ndiyo maana baada ya utawala wa Idd Amin kuanguka, vilikutwa vichwa vya watu katika majokofu ya Ikulu na hata kutunza baadhi ya vifaa vya marehemu kwa sababu zisizojulikana.

Aidha, ilibainika kuwa utawala huo ulikuwa na kiu ya pekee ya kuua watu wa eneo fulani kwa sababu ambazo hazikuwa zikitajwa hadharani na wauaji hao. Baadhi ya wahanga wa tawala dhalimu na dhaifu huwa wanakatwa baadhi ya viungo vyao na wao kushiriki katika mazishi ya viungo vyao wao wenyewe! Nachelea kusema kuwa tunaelekea huko kwa sababu kiu ya viungo vya miili ya wana habari ni kubwa mno kwa sasa.

Absalom Kibanda ni Mkristo sawa tu na wengine niliowataja hapo juu. Siku za karibuni tumeshuhudia makanisa yakichomwa moto (takribani 54 mpaka sasa nchini kote). Tumeshuhudia wakristo wakifunguliwa kesi na polisi kwa kosa la kuchinja vitoweo vyao (takribani kesi 16 nchini kote).

Tumeshuhudia wachungaji na makasisi watatu wakiuawa (Mto wa Mbu, Geita na Zanzibar). Tumeshuhudia makasisi na maaskofu wakishambuliwa kwa risasi na silaha nyinginezo (Zanzibar, DSM na Mwanza). Tumeshuhudia serikali kupitia mawaziri, wakuu wa mikoa na wilaya wakitoa amri za kidini kana kwamba wamegeuka makadhi. Tumeshuhudia mzaha wa kuyaambia makundi yanayohasimiana kidini kuwa yakae yamalize tofauti zao.

Tumeshuhudia vipeperushi na kanda za kuhamasisha mauaji ya viongozi wa dini huku serikali ikiwaambia viongozi wa dini wajilinde. Tawala dhaifu na dhalimu huwahofia sana viongozi wa dini na dini yao. Kwa hiyo yaweza kuwa hatari zaidi kuwa mwandishi wa habari na hapo hapo ukawa katika dini inayohofiwa.

Kwa kuwa haya yaliyotajwa hapo juu hayajapatiwa majibu, yametoa mwanya kuruhusu bongo mbalimbali kufikiria zinavyotaka. Mathalani, wapo waliosikika wakisema kuwa Kibanda amepata adhabu kwa sababu ama yeye, au mmoja wa waandishi wake, aliandika taarifa inayotuhumu dini fulani kuwa imeweka kambi ya kigaidi huko Ukerewe-Mwanza.

Kwamba, hata baada ya kuambiwa aombe radhi alikataa. Kwa nini basi kama hilo lilitokea, watu wasiamini kuwa kundi lililomtaka aombe radhi linahusika na utekaji wake?

Watu wengi wasomi kwa watu wa kawaida wanaanza kuona kwamba taifa letu limekumbwa na udini. Kwa hiyo ni sahihi pia kufikiri kuwa, hata kama haipendezi, kuwa suala la dini ya Kibanda lisipuuzwe. Hii hoja ni nyepesi kama dola yetu ilivyo nyepesi na inavyopenda majibu mepesi kwa maswali magumu.

Nimalize kwa kumtakia uponyaji wa haraka Absalom Kibanda. Jicho lake lililoharibiwa limesababisha hata vipofu wapate kuona kinachoendelea katika taifa letu. Damu yake iliyomwagika bila hatia itaharakisha harakati za kulipatia taifa letu dola iliyo imara na thabiti ya kulinda uhai wa watu wake. 

Jicho la mwandishi ni jicho la jamii. Kumtia upofu mwandishi ni kuitia jamii upofu. Ni watawala vipofu tu wanaotamani kufanya kazi na waandishi vipofu.

Soma zaidi kuhusu:

Tufuatilie mtandaoni:

Wasiliana na mwandishi
Msomaji Raia
msomajiraia@yahoo.co.uk

Maoni ya Wasomaji

Pamoja sana msomajiraia. Kijiko ni kijiko na sepeto ni sepeto!

Waandishi wa habari siku zote huona kuwa yanayowapata wengine wao hayawahusu na ndiyo sababu hawana umoja. Kuna sababu gani ya msingi inayowazuia kugoma kuandika habari japo kwa siku tatu tu, mwangosi alipouawa ilikuwa ndiyo mwanzo wa kuonyesha kuwa tasnia hii ni muhimu lakini kutokana na ubinafsi na kujari zaidi maslahi binafsi ya wamiliki wa vyombo vya habari sasa imetokea kwa Kibanda. Jamii ya Kitz haioni kama wanahabri ni muhimu kwanini wao wajifanye wanawapenda sana wabongo kwa kudai kuwa ni wajibu wao kuhabarisha. Waliandamana sawa Watz wangapi waliwaunga mkono? hakuna kitu muhimu kama uhai wako hiyo ipo kwa kila chuo cha uandishi wa habari! make it dark for a few days then they will realise. Gomeni Gomeni Gomeni.

Napenda kutoa pole kwa Ndugu Kibanda familia yake na watanzania wote ambao tunapitia kipindi hiki kigumu katika historia ya Taifa letu. Mwisho wa siku mwenyezi Mungu atalipa kila tone la damu lililomwagika bila hatia.
Pamoja na hayo, ningependa sana kujitofautisha na ujumbe ambao mwandishi amejaribu kuuweka kwa watanzania waweze kuufanyia kazi. Nakumbuka juzi ndugu mengi aliwasihi waandishi wajitahidi kuwa makini katika matumizi ya taaluma zao kuliandika tukio hili kipindi ambacho uchunguzi unafuatiliwa, pia kamati teule ya wadau wa habari ikiwa imepanga kukutana na serikali na taasisi zake za usalama.
Kauli ya kuhusisha matukio haya na mbeya or wanyakyusa inaonesha dhamira yakutaka kutugawa na kutuchanganya watanzania na kutujengea hofu isiyokuwa ya lazima. Tuache tuomboleze na tutafakari kwa pamoja na sio kupitia makabila yetu na dini zetu ilitupate mawazo muafaka zaidi. am sure weledi wako haujakufunza hivyo.
Nakutakia kazi njema, nawatakia subira na tafakuri sahihi katika kujaribu kupatia muafaka matatizo haya makuu. duniani kuna kuna mengi na watu wana maadui wengi pia.
Mohamed Lisagu

Mbeya kuna siri nyingi. Uwanja wa ndege, Madini ambayo yanamilikiwa na vigogo fulani, hata kusini. kuanzia Ruvuma, Mtwara. Ni hawa wakuu wameichezea hii nchi, na mara nyingi kuionea kusini na kufanya watu wa kusini wamelala.
Mali nyingi kusini yamilikiwa kinyume kutumia nguvu za viongozi kisiasa. yeyote anayetoa tuhuma zidi ya uchafu wao anatoweka. Hii si siri. Wanamiliki kuwapitia Wachina, Waarabu na wengineo. Watoto wao na wake zao. Ni jambo tete ambalo limeingilia na kuichafua Tanzania kwa kujibinafsisha. Ni vigumu kwa kuwa msururu ni mkubwa. Na wanaopewa vyeo na pesa kwa kufungwa midomo ni wengi mno.
Ni viongozi wachache sana ambao si wahujumu.
Tuone mikutano hii ya walinzi wa Taifa kama italeta ufumbuzi wowote.
Wamejilinda ndani na nje ya Tanzania.
Ni Raisi wa nchi hii kumshukia na viongozi wengi aliowateua na maraisi waliopita na wake zao.
Unaona kabisa mke wa Raisi mbeya anapigiwa saluti akitoa misaada. Huku ni kufunika mambo wanayoyafanya. Hivi vizawadi ni mali ya watanzania haijatoka mikononi mwao.Misaada iliyopewa kwa kuwafunga macho watanzania. Kuwachotea mali zao na kupewa visumni.

Makala yako imeenda kule kule kwenye fikra za udini, dhana ya udini, sidhani kama una uhakika na hayo uliyoyasema, yatupasa kuwa makini na kutafakari kabla ya kuandika, hili nalo linaongeza hisia za kidini na gepu kuwa kubwa zaidi, tujitafkari. tujifunze kuwa na uandishi kwa kisayansi unaojaa utafiti uliyoshiba. Kuandika kwa kuhisi ni hatari zaidi.
Kosa linalofanywa na serikali yetu tukutu ni kunyamazia chunguzi kama ulivyoainisha, nakubalina na ww, hili litatugharimu sana.

Mohammed Lisagu upo sahihi ( you are quite right), kuteswa kwa Kibanda na Dr  Ulimboka hakuhusiani na dini. Hii ni kazi ya mafisadi ambao wapo serikalini na kwenye shughuli binafsi na matikio kama haya yalikuwa yanafanyika kwa jirani zetu Kenya na Uganda na sasa tumewaiga. Mfano nzuri ni kule Kenya kwa kutoweka  kuteswa na kuuwawa A Kodek, Thoma Mboya, Robert Ouko, J M Kariuki na wengine wengi na Tz iliaanza na Imran Kombe.
Richard

Sasa habari kama hizi kweli ndiyo zimeandikwa na muandishi makini? si ndiyo uchochezi huo nz ugombznishi kwa jamii. Hakuna anayefurahia mtu kudhuriwa katika hali yoyote ile seuze ukichukulia mtu mwenyewe siyo mhalifu naye hajawahi kumdhuru mtu, lakini kuhusisha mtu kudhuriwa na ukabila huo nao ni uchochezi na kuwagawa watu.
Ni matatizo ya uandihshi kama huu yaliyosababisha madhara huko Rwanda, na pengine ni uandishi wa namna kama hii ndiyo uliyomfanya laiyekuwa rais wa awamu ya tau Mr. Ben aseme kwamba Tanzania hakuna waandihsi wa habari

HAKIKA  MSOMAJI RAIA UKO MAKINI
OMBWE LA UONGOZI KATIKA NCHI HII LIMEPELEKEA DINI MOJA KUJIONA INA HAKI KULIKO NYINGINE.
HATA KAMA MNAKATAA....KWA NINI WOTE WAKRISTO?

Ni vigumu kuthibitisha kama wote walioteswa na "watu wasiojulikana" ni kwa sababu ya udini. Je Saed Kubeanea? Hapa jambo kuu ni kwamba serikali iliopo haijiamini na inafanya kazi ya kuogofy watu wanaojaribu kuikosoa

Mwandishi wa makala hii ana lengo moja nalo kutia fitna ya kidini na ukabila . mimi ningependa kumuuliza maswali mawili matatu hivi:--
Je ikitokea watu wamefanya fujo na kupoteza maisha na sababu ni hii makala yako utapata furaha?
nadhani nijibu - kama waliouawa si ndugu zako utaona poa tu . je wakiuawa nduguzo utajihisi vipi ??
ndugu angalia dhamira yako na wapende binaadamu wenzako na elewa matendo mema ndiyo yatakupeleka peponi na matendo mabaya yatakupeleka motoni na binaadamu yoyote mwisho wake ni kaburi tu.
hivyo jaribu kuwaelimisha watu kwa kutumia kalamu yako kwa mambo mema na usilete fitna kwa sababu fitna ni mbaya kuliko kifo .

Tunawaheshimu, bali ni kweli bado hatuna waandishi wa habari madhubuti tanzania, aidha wote wanaendeshwa na hisia zao kuandika habari na si taaluma, nadhani udini na ukabila ni hoja ilioshika kasi, ingawa mwandishi amesita kutaja kwa kalamu bali anautuhumu uislamu kwa kufanya hayo, si kuwa namsikitikia mwandishi kwa kukosa weledi wa kutafakari na kuendeshwa na matamanio ya nafsi yake katika uandishi bali pia ni muandishi wa kufuata mkumbo.
HAKUNA yeyote duniani anayeweza kumfanya mtu mwingine akaacha kufikiri isipokuwa mtu mwenyewe husika, na kwa hakika kishawishi cha kuacha kufikiri ni kikubwa kwa sababu kufikiri ni kazi ngumu yenye kuzalisha changamoto nyingi ambazo ni watu jasiri tu ndio wako tayari kupambana nazo. kwa hakika umenifanya nianze kutafakari uwepo wa tuhuma hizi za wazi zifanyazo na wanahabari wa baaadhi ya dini ya kikristo na tutafikia tamati ya hili

 
Huyu si mwandishi bali ni mhandisi wa uongo, chuki, uchichezi na udini. Watu wa makabila mbalimbali wamekumbwa na matukio ya ajali, vifo na mashambulizi hakuna anae shabihisha na dini, kabila, au taalum zao. Wamekufa/uawa akina Dr Kleruu, Imran Kombe, Kabeho, Kolimba, Malima, Sheikh Kassim bin Jumaa nk nani kafananinisha na maswahibu yao na dini zao?
Hujui unachoandika unatafuta umaarufu kwa kuandika contraversial story upate pa kutokea ni ujinga na ulimbukeni vinakusumbua
Shame on you!

Toa maoni yako